DIRBÊSIYA MIN


1 قراءة دقيقة
29 Mar

DIRBÊSIYA MIN


Dirbêsiya min…
Metirse ji bêbextiya demê
Ez tim te himbêz dikim.
Bi şev û rojan.
Ez xaka te dipîvim
Bi hestên hebûna xwe.
Tê tim bimîne
Xetîra azadiyê
Di nav çavên sitema
Rûreşkên mirovatiyê de.
Tê tim bimîne kela ronahiyê
Di koşika demên tal û tarîde.
Tu kes nikare te binixumîne
Di pexla bêxwedîka dîrokê de.
Û tu kes nikare te veşêre
Di qorzîka xewnên wenda de.

***

Erê dirbêsiya min
Ta ez hebim
Ez nahêlim tucarî dijmin
Li meydanên te bilîzin.
Û dêwên kenok
Kiryarên xwey keysebaz
Binimînin li ser sînorên te.
Ma ne şerme îro AHRÎMAN
Dixwaze kolanên te vala bike.
Û konên xweyî reş vegre,
Di nîva ahînên bêdengiya te de.
Û kurmê dilê xwe bişkîne
Li kêleka rondikê çavên te..

***

Dîsa ez dibêjim
Dirbêsiya min
Tu agir nikare te bişewitîne.
Ji ber ku,
tu nîşana azadiyê ye
Û kela mêrxasên Dimdimê ye
Ma wê çawa AHORAMEZDA
Bihêle MARSÊ Ixrîqê
Çirifîtkan bide xwe
Li ser xaka te
Û kela girî di qirika te de bihêle.

***

Erê dirbêsiya min
Tu warê hoza KîKANE
Bila çemê EKSOZÊ
Pesnê ciwaniya te bide.
Bila girê HESIKÊ
Û çemê ZIRGANÊ
Di der mafê lehengiya te de
Xeberbidin.
Tenê ez karim bibêjim:
Tê her û her
Bibe guleke evîndar
Û di nîva dilê me de bimîne.

Mesûd Dawid- Hewlêr

ربما تحتوي الصورة على: ‏‏‏‏سماء‏، ‏‏جبل‏، ‏نشاطات في أماكن مفتوحة‏‏‏ و‏طبيعة‏‏‏



03Jan
03Jan